A exposición “ART NATURA”, promovida por ADEGA, os concellos de Lugo e Santiago e as Consellarías de Medio Ambiente e Cultura, inaugurarase na cidade luguesa o vindeiro día 21 de maio, luns, ás 5 da tarde no Centro Social e Cultural Uxío Novoneyra.
  A mostra intenta ser unha actividade itinerante por todo o territorio de Galiza en defensa da Rede Natura galega e en defensa do Patrimonio Natural galego en xeral.
  Lugo é a terceira cidade na que se expón “Art Natura”, tras Santiago e O Carballiño, onde tiveron unha boa acollida. Participan nela máis dun cento de artistas galegos con 102 obras plásticas, 28 literarias, e 2 audiovisuais, e entre elas, hai máis dunha vintena de obras pertencentes a autores e autoras da provincia de Lugo.
  A exposición estará aberta ao público desde o 21 de maio até o 14 de xuño, de 4 da tarde ás 9 da noite.
Por outra parte, os centros educativos que o desexen poderán concertar visitas guiadas para os seus alumnos e alumnas que, posteriormente, participarán nun concurso de debuxo inspirado nunha temática ambiental co resto dos centros educativos galegos. O horario de visita para os colexios será das 10 ás 14 horas da mañá.
  Os teléfonos de contacto para os interesados/as en concertar visitas ou mercar algunha das obras que estarán á venda son o 982240299 ou 669262484.