31 de xullo de 2008. O informe do Consello de Contas pon de actualidade o que ADEGA e COGADER (Coordenadora Galega en Defensa dos Ríos) denunciaron xa hai anos: o escandaloso proceder dunha administración que utilizaba os nosos recursos naturais para o reparto de prebendas entre amigos, cuñados, etc. através da concesión irregular de encoros e parques eólicos. Foi xa que logo, un saqueo en toda regra. Mais ADEGA quere ir máis aló de esixir responsabilidades políticas e penais (que xa investiga o fiscal) aos culpábeis deste saqueo. O actual governo ten o deber de non ser cómplice deses manexos, e impedir que continúe tramitación de minicentrais concedidas irregularmente. Hai mecanismos como a caducidade ou o resgate das concesións, a revisión dos estudos e declaracións de impacto e mesmo a anulación das adxudicacións polos motivos que aponta o Consello de Contas, que a Xunta debería exercer para non ser cómplice dos manexos de Ordás Badía, Castro Valdivia, Fontenla, Paco Vázquez e demáis compaña.

 

---

Malia á suspensión en 2005 da concesión de 32 aproveitamentos hidroeléctricos e á aprobación da ILP en Defensa dos Ríos no 2006, son aínda moitas as minicentrais que amezan a vida dos nosos ríos. As concesións hidroeléctricas feitas na era Fraga e agora denunciadas polo Consello de Contas, poden efeitivizarse en calquera momento. Abonda con meter unha pá no río nos dous-a-catro anos seguintes á concesión para validar o "comezo" das obras, podendo logo demorarse sine die, por motivos "xustificados". Esta trécola permite que as empresas, algunhas sen capacidade económica algunha, teñan aferrollados moitos ríos para especular cos aproveitamentos.  A maiores, nestes intres atópase en revisión o Plano Sectorial Hidroeléctrico para adatalo á Directiva Marco da Auga (2001/42/CE) e ao fixado pola Lei de Defensa dos Ríos Galegos (Lei 5/2006). Por iso, ADEGA propón que alén de revisar os supostos ambientais para limitar a instalación de minicentrais dacordo á clasificación das masas de auga e ao seu estado ecolóxico, así como a modificación dos caudais mínimos, deberianse revisar as concesións existentes e solicitadas. Non menos importante é a modificación do procedemento administrativo das concesións para evitar o favoritismo, a especulación e a picaresca que mantén aínda hoxe unha espada de Damocles  sobre ducias de cursos fluviais.

 Tal como recoñece o Consello de Contas, a concesión de aproveitamentos realizouse mediante procedementos administrativos sumarísimos con Declaracións Ambientais feitas en catro días -vaia dilixencia- cando o goberno estaba en funcións, e no último minuto como quen reparte o botín antes de que chegue a policía. Non é recibo que unha persoa, por ser quen é ou pon contar con bos "amigos" teña ao seu nome 27 empresas eléctricas, a maior parte delas con capital mínimo. Son auténticos chiringuitos que só valen para revender os dereitos de explotación a prezos elevados ás transnacionais do ramo, nas que por certo se aseguran suculentos postos e xubilacións douradas. No caso de Ordás Badía, a multinacional Endesa fichouno para dirixir os seus negocios enerxéticos en Portugal.