Agora xa podes baixar a versión dixital do nº 60 da revista CERNA. A presente edición presenta na capa unha balanza, símbolo da Xustiza, que nos últimos meses pesou máis do lado da protección medioambiental que da banda dos intereses especuladores e privados. Varias sentenzas favorábeis á defensa e protección do patrimonio natural de Galiza constatan este feito, como as que declaran ilegais o proxecto da piscifactoría de Acuinor en Rinlo, espazo de Rede Natura; os recheos efectuados no Porto de Marín en dominio público marítimo-terrestre; ou a localización dos depósitos de hidrocarburos no peirao do Ferrazo. Preme para baixar a  CERNA 60 (7.48 MB)

 

4 de febreiro de 2010. O Proxecto Ríos ven de apresentar, conxuntamente coa Universidade da Coruña, un programa de promoción do voluntariado no seo de dita universidade. Dentro do Programa de Promoción do Voluntariado Ambiental para o alunado da UDC, o Proxecto Ríos deu conta das actividades e propostas que se están a desenvolver con alunos e alunas dos campus de Elviña e A Zapateira. Estas actividades están relacionadas coa custodia do territorio, unha nova ferramenta en educación ambiental para a conservación da biodiversidade através do voluntariado.

3 de febreiro de 2010. A ampliación da canteira "Costa Grande 2" estenderá o impacto paisaxístico dende Muros-Noia á enseada de Carnota e ría de Corcubión, sendo visíbel mesmo dende Fisterra. Unha das paisaxes máis representativas do país, dominada polo macizo do Pindo, verase irremediabelmente estragada nun ano no que agarda un incremento de visitas á bisbarra polo Xacobeo. Todos os montes entre Muros e Carnota son un excepcional xacemento de petroglifos, a maioría sen catalogar. E a zona está incluida na proposta de ampliación da Rede Natura presentada en 2007 e pendente de aprobación. Sen catálogo de paisaxes protexidas, sen ampliación da Rede Natura e cun patrimonio arqueolóxico descoñecido pola administración, canteiras, parques eólicos e piscifatorías teñen "barra libre".  Alegacións CANTEIRA (31 KB)

 

Este 2 de febreiro celébrase o Día Mundial dos Humidais, para comemorar a sinatura en 1971 da Convención Internacional sobre Humidais en Ramsar (Irán). Este ano, preténdese pór de manifesto a importancia das zonas húmidas para facer fronte aos efectos da mudanza climática. Non abonda coa protección dun humidal: a súa correcta xestión precisa integrar transversalmente as políticas sectoriais (infraestruturas, industria, urbanismo, etc), principais causas da degradación destes espazos. En Galiza temos moitos exemplos de mala xestión das zonas húmidas, como o caso de Baldaio ou o máis recente da Frouxeira. E o novo POL (Plano de Ordenamento do Litoral) non garante que os valiosos humidais costeiros estean libres de "aproveitamentos sustentábeis" como portos deportivos, piscifatorías, recheos e paseos...

 

29 de xaneiro de 2010. Estes días, o ministerio de Industria vai pechar o concurso para que os concellos que o desexen opten ao Almacén Temporal Centralizado (ATC) para os refugallos das nucleares. A imprevisión do lobby nuclear e a complicidade do governo que pasou da moratoria ao "xa veremos" (velaí prórroga de actividade de Garoña) están detrás dunha bochornosa carreira na que os concellos rifan por acoller o ATC co engado dos cartos e os postos de traballo. ADEGA insiste na necesidade de abandonar a enerxía nuclear e poñer data de caducidade ás centrais actuais. As empresas deben ser as responsábeis de xestionar os seus refugallos onde os producen e non socializar os riscos e custos do seu tratamento. E aproveitamos para lembrar ao Sr. Blanco que Galiza foi declarada en 2006 por unanimidade dos tres grupos parlamentares TERRITORIO DESNUCLEARIZADO.

 

28 de xaneiro de 2009. Esta fin de semana vai ser nefasta para a nosa fauna. Ao "campionato" estatal de caza de raposo, que vai perpetrarse en Portomarín, hai que engadir a batida de lobos autorizada nos montes do Suído. Se o primeiro "evento" amosa a cara máis depredadora e irracional dunha actividade diametralmente oposta á xestión sustentábel da caza, no que o obxectivo é matar por matar, a segunda confirma a guerra declarada que a nova Xunta libra contra o lobo, unha especie emblemática da nosa fauna. Tais comportamentos, máis propios da política franquista de cazatas e exterminio de "alimañas", amosan ben ás claras a falta de compromiso da nova administración coa conservación da nosa fauna salvaxe.

 

O primeiro curso deste novo ano adicarémolo á construcción de refuxios que lles poidan servir de acubillo e lugar de cría a moitas especies nestes duros días de inverno. Será o vindeiro sábado día 30 na Eira da Xoana. A tala dos bosques autóctonos e a substitución por monocultivos, así como a retirada das árbores vellas dos montes, ten entre outras consecuencias, a desaparición de multitude de buracos necesarios para que moitas especies de animais nidifiquen ou se refuxien. A construcción de caixas niño e outros abrigos para a fauna (paxaros, mamíferos, anfibios…) contribue a paliar este impacto favorecendo á biodiversidade.

Descarrega o  Cartaz REFUXIOS FAUNA (0,7 MB) 

 

Compostela, 27 de xaneiro de 2010. A consellería do Mar ven de modificar o Plano Galego de Acuicultura aprobado en 2008, para mudar o réxime de propiedade dos terreos. Se no plano do bipartito, as terras eran de propiedade pública cedidas por concesión, coa modificación que a Xunta introduciu déixase ás empresas a merca dos terreos. Iso sí, a administración segue podendo expropiar "se así fose necesario" cando as empresas non poidan facerse coas terras. Isto é: se os veciños non queren vender ás empresas, a administración expropiará entón as terras. Mais o sorprendente é que esta modificación afecta ao Plano Acuícola do bipartito, sobre o que o TSXG na sentenza de Touriñán, advertíu da súa nulidade por "defecto de procedemento". Cal é entón o Plano Acuícola vixente? Vaites coa seguridade xurídica!